Semuel Batlayar: "PESTA ADAT TULUDE"

Demi mo jaga deng iko melestarikan Seni Budaya yang ada di Sulawesi Utara. Kita tulis ini tulisan,sekaligus berbagi apa yang kita tau, deng satu kali melestarikan torang pe budaya. .

Sebelum kita mo ba lamu, kita mo perkenalkan diri dulu.

kita pe nama Semuel Batlayar, kalo mo pangge Sem jo...

di sini kita mo cirita tentang kebudayaan Sangihe atau Sanger yang kita sadiki tau. Biar kita blasteran Minahasa-Maluku, mar kita cuma mo coba berbagi cerita tentang budaya orang Sanger. kita tau budaya Sanger lantaran kita dari kacili sampe skarang tinggal di lingkungan orang sanger, jadi kalo mo bilang Sanger so jadi darah deng daging for kita *lebay...

di sini kita mo cirita tentang pesta adat orang sanger, ato Pesta Adat

"TULUDE"

Arti kata tulude ato menulude berasal dari kata suhude, bahasa Sangihe yang de pe arti tolak. Sedangkan tulude berarti menolak atau melepaskan.

Tulude orang Sanger ja beking di stiap awal tahun, ato lebeh tepat tanggal 31 Januari (laeng kali ta lewat sadiki).

Makna Pesta/upacara adat ini for mengucap syukur for samua Tuhan pe berkat dan perlindungan di tahun yang so lewat deng memohon supaya Tuhan tetap kase berkat, kesehatan deng perlindungan di tahun yang akan datang.

de pe susunan acara biasa mulai deng penjemputan para sesepuh adat bisa di katakan pemerintah, biasa di jemput dengan tarian adat.

*penjemputan tamu

Kalo itu tamu so ta dudu, acara utama langsung mulai, ada de pe ibadah dengan doa. abis itu Syukuran dan pujian. abis itu de pe acara puncak pemotongan kue Tamo ato kue adat.

kalo so klar itu, ada depe acara hiburan deng kesenian. ada de pe tari-tarian deng lagu-lagu.

pokoknya rame noh...

mungkin cuma itu dulu kita mo cirita... nanti jo kapan-kapan kita cerita ulang...
deng kita cuma mo pesan jo for tamang-tamang samua, mari jo torang jaga deng lestarikan torang pe kesenian deng budaya yang ada. jangan sampe torang pe kesenian deng budaya ilaang percuma, ato orang ambe... jangan sampe eso-eso paka testa...